У мінулую суботу ў Мінску на пляцоўцы перад лядовым палацам па вул. Прытыцкага прайшоў абласны сельскагаспадарчы кірмаш. Удзел у ім прынялі раённыя спажывецкія таварыствы, рыбныя гаспадаркі, фермеры і ўладальнікі аграсядзіб, народныя майстры з розных куткоў Мінскай вобласці.
Свежую зелень і агародніну, мясныя і малочныя прадукты, рыбу, мёд і ласункі, прадметы дэкаратыўна-прыкладнога мастацтва з задавальненнем куплялі сталічныя жыхары, якія прыходзілі на кірмаш цэлымі сем’ямі. Асаблівую радасць маленькім мінчанам прыносілі казляняты, з якімі за сімвалічную плату можна было пагуляць на адной з пляцовак.
На кірмашы ахвотна набывалі і прадукцыю прадстаўнікоў Лагойшчыны. Лагойскае райспажыўтаварыства прапаноўвала шырокі асартымент тавараў для садаводаў і агароднікаў: насенне розных культур, у тым ліку бульбы і цыбулі, сродкі догляду за раслінамі, поліэтыленавую плёнку для градак, дэкаратыўныя фігуркі для аздаблення ўчастка і нават кульціватар для апрацоўкі глебы.
Мёд розных гатункаў, напоі, прыгатаваныя на яго аснове, і іншыя прадукты можна было купіць у павільёне аграсядзібы “Малінаўка”, уладальнік якой Канстанцін Лісіца ўтрымлівае пчальніковую гаспадарку “Нектар Лагойшчыны”.
На кірмашы свае вырабы – гліняныя фігуркі, прадметы інтэр’еру, посуд – прадставіў народны майстар-ганчар Мікалай Стрэльчанка.
А дапамагалі стварыць добры настрой наведвальнікам артысты Лагойскага цэнтра культуры і вольнага часу разам з народным ансамблем народнай песні “Шчодрыца”.
Алена Масцерава, «Родны край»